Prosjektmedarbeidar for digitalt utanforskap og  «Bli med på fritidsaktivitet i Stad».

Felles for prosjekta er at dei skal styrkje inkludering og deltaking gjennom betre samarbeid mellom kommunen, frivillige lag og organisasjonar og andre aktørar. Camilla vil derfor vere i kontakt med mange lag, organisasjonar, frivillige og kommunale tenester i tida framover.

Arbeidsstaden vil vere delt mellom Selje og Nordfjordeid, med oppgåver fleire stader i kommunen. 

Digital opplæring og hjelp i Stad kommune
Prosjektet «Etablering av faste opplæringsarenaer for digital kompetanse i Stad kommune» er finansiert med prosjektmidlar frå Digitaliseringsdirektoratet.

Hovudmål
 Det skal vere enkelt å få digital opplæring og hjelp i Stad kommune.

Prosjektet skal byggje vidare på eksisterande tilbod og samarbeid, og gjere digital hjelp meir tilgjengeleg, føreseieleg og synleg.

Det skal mellom anna:

• etablere faste arenaer for digital hjelp og opplæring i Selje og på Nordfjordeid, med faste og føreseielege tidspunkt for når innbyggjarane kan få hjelp
• prøvast ut oppsøkjande digital hjelp til personar som ikkje sjølve kan møte på dei faste arenaene 
• rekrutterast og givast opplæring til frivillige digihjelparar 
• leggjast til rette for kurs og opplæring for både frivillige og kommunalt tilsette 
• styrkjast eksisterande frivillige miljø som driv med digital opplæring 
• samordnast aktivitetar i halvårsprogram 
• arbeidast med informasjon og marknadsføring av tilboda. 

Prosjektplanen legg særleg vekt på to faste arenaer ved bibliotek/frivilligsentral i Selje og på Nordfjordeid, og på å styrkje frivillige gjennom rekruttering og opplæring av digihjelparar. 

Kven er tilbodet for?
 Målgruppa er alle innbyggjarar i Stad kommune som ønskjer å bli tryggare digitale brukarar, med særleg merksemd på dei som av ulike grunnar har vanskar med å ta del i den digitale kvardagen.
 Kommunalt tilsette som møter desse gruppene er også ei målgruppe. 

Frivillige lag og organisasjonar er viktige samarbeidspartar. Prosjektet skal ikkje erstatte det gode frivillige arbeidet som allereie finst, men bidra til å styrkje, samordne og vidareutvikle det. 

Bli med på fritidsaktivitet i Stad!
 Målet med prosjektet er at fleire born og unge skal få like moglegheiter til å delta i fritidsaktivitetar i Stad kommune.

Det finst mange gode aktivitetstilbod i kommunen, men det kan vere ulike grunnar til at barn og unge ikkje deltek. Det kan mellom anna handle om økonomi, transport, tilrettelegging, informasjon eller at ein ikkje kjenner til tilboda.

Prosjektet skal derfor arbeide med fire hovudområde:

Kartleggje og synleggjere
 Vi skal få betre oversikt over kva organiserte fritidsaktivitetar som finst for born og unge, og bidra til at informasjonen er lett å finne og halde oppdatert.

Stad Foreiningsportal og ungfritid.no vil vere viktige verktøy i dette arbeidet. 

Finne og redusere barrierar
 Vi ønskjer å få meir kunnskap om kva som kan gjere det vanskeleg for barn og unge å delta.

Lag, organisasjonar og andre aktivitetstilbydarar vil vere viktige i dette arbeidet. Prosjektet skal kartleggje kva utfordringar dei opplever, kva kunnskap og støtte dei treng, og kva eksisterande ordningar som kan bidra til å redusere barrierane.

Dette kan til dømes vere økonomiske støtteordningar, transportløysingar, universell tilrettelegging eller betre informasjon til barn, unge og føresette. 

Samarbeide og dele kunnskap
 Prosjektet skal styrkje samarbeidet mellom frivillige lag og organisasjonar, aktivitetstilbydarar, kommuneorganisasjonen, barn og unge og føresette.

Det skal også arbeidast tett med kommunale tenester som møter barn, unge og familiar, mellom anna gjennom BTI – Betre tverrfagleg innsats.

Målet er at dei som møter barn, unge og familiar skal vite både kva aktivitetar som finst og kva moglegheiter som finst for å hjelpe fleire til å delta. 

Byggje varige system
 Prosjektet skal ikkje berre kartleggje situasjonen her og no.

Eit viktig resultat skal vere tydelege roller, arbeidsdeling, rutinar og årshjul for korleis kommunen, frivillig sektor og andre aktørar kan samarbeide om inkludering i fritidsaktivitet også etter at prosjektperioden er over.
 
 Kva betyr prosjektet for lag og organisasjonar?

Lag og organisasjonar vil vere sentrale samarbeidspartar i begge prosjekta.

I løpet av prosjektperioden kan Camilla mellom anna ta kontakt for å:

• få informasjon om aktivitetar og tilbod 
• høyre kva erfaringar de har med deltaking og barrierar 
• kartleggje behov for informasjon, kompetanse eller andre tiltak 
• hjelpe med synleggjering av aktivitetar 
• samarbeide om digital opplæring eller rekruttering av frivillige digihjelparar 
• invitere til møte, kurs eller andre samarbeidsarenaer. 

Har laget eller organisasjonen dykkar erfaringar, innspel eller idear som kan vere relevante for prosjekta, ønskjer vi gjerne å høyre frå dykk.

Kulturavdelinga i Stad kommune, ved Eid frivilligsentral og Selje frivilligsentral, håpar prosjekta kan bidra til sterkare samarbeid, betre inkludering og gode system som også kan vere til nytte for frivilligheita i Stad i åra som kjem.