Årets TV-aksjon til Atlas-alliansen: Sett av 19.oktober - til å vere bøssebærar?

Nesten 1,3 milliarder menneske i verda ( 16 prosent*) har ei funksjonsnedsetting, og dette gjer dei til verdas største minoritet. Mange av desse lever i fattigdom og har dårleg eller liten tilgang til utdanning og helsehjelp. I tillegg har talet på menneske med funksjonshemmingar auka dramatisk i konflikt- og krigsområde dei siste åra. I Palestina risikerar no ein heil generasjon barn å vekse opp med alvorlege funksjonsnedsettingar på grunn av krigen. 

Pengane skal gå til skulegang, helsetenester, naudhjelp, og hjelpemiddel som rullestolar, krykker, briller og proteser. I krig og konflikt er menneske med funksjonsnedsettingar ekstra sårbare, og nokon vert og forlétne åleine i krigssoner utan høve til å få hjelp. 

Årets TV-aksjon skal sørge for at naudhjelp kjem fram til funksjonshemma, og at 200 000 menneske med funksjonsnedsettingar og familiane deira i Palestina, Ukraina, Etiopia, Nepal, Tanzania, Uganda og Zambia får eit betre liv. 

- År etter år mobiliserar heile Noreg for å gjere ein skilnad. Bøsseberarar, alle som gir, kommunar, frivilligsentralar, skular, barnehagar, næringsliv og andre deltek på mange viktige måtar. Gjennom innsatsen deira byggjer vi eit fellesskap som strekkjer seg over heile landet inn mot aksjonsdagen, seier Nina E. Larsen som er leiar for NRK TV-aksjonen. 

Ho oppmodar alle frivillege og organisasjonar til å sette av søndag 19. oktober til TV-aksjonen og bli med på verdas største dugnad.

 Atlas-alliansen er ein paraplyorganisasjon for åtte organisasjonar av og for menneske med funksjonsnedsetjingar. 

Organisasjonane er Norges Handikapforbund, Funksjonshemmedes Fellesorganisasjon, Norges Blindeforbund, Norsk Forbund for Utviklingshemmede, Ryggmargsbrokk- og Hydrocefalusforeningen, Mental Helse Ungdom, Norges Døveforbund og Stiftelsen Signo. 

-Di støtte til TV-aksjonen 2025 kan bidra til varige endringar som gir auka livskvalitet, respekt og fridom, seier dagleg leiar Marit Sørheim i Atlas-alliansen

Alliansen har drive bistand- og påverknadsarbeid for funksjonshemma sine rettar i over 40 år i land som er råka av krig, kriser og fattigdom. 

*Tal frå Verdas Helseorganisasjon, WHO: “Global report on health equity for persons with disabilities”, desember 2022

Bilettekst: Loyce (7 år) er fødd med Cerebral Parese og går på ein inkluderande skule i Vest-Uganda, der barn med og uten funksjonshemmingar går i same klasse. Årets TV-aksjon 19. oktober går til Atlas-alliansen. Foto: Truels Zeiner-Henriksen/ NRK TV-aksjonen.