Stad kulturskule
Stad kulturskule tilbyr undervisning i musikk, dans og kunst til barn og unge i alderen 3 til 20 år.
Kulturskulen er eit lovpålagt skuleslag. Kulturskulen sitt samfunnsoppdrag og formål er forankra i Opplæringslova kap. 26:
§ 26-1 Kulturskule: Kommunen skal ha eit tilbod om kulturskule til barn og unge, organisert i tilknyting til skulen og kulturlivet. § 26-2 Formålet med kulturskulen: Kulturskulen skal leggje til rette for at elevane får delta i ulike aktivitetar der dei får lære, oppleve, skape og formidle kulturelle og kunstnariske uttrykk, i eit trygt og godt skolemiljø.
Stad kulturskule har om lag 300 elevar som deltek i kjernetilbodet eller får undervisning som aspirant eller junior. Det er 6,41 årsverk knytt til kulturskulen fordelt på 12 tilsette. Stad kulturskule tilbyr undervisning i faga dans, piano, strykeinstrument, gitar, trommer, song, messinginstrument, treblåseinstrument, visuell kunst, band, kor og orkester. Kulturskulen sel i tillegg tenester til korps i kommunen, inkludert aspirant- og junioropplæring.
Kulturskulen sine lokale er samlokalisert med Eid ungdomsskule. I tillegg underviser lærarane på åtte andre skular i kommunen. Undervisninga går føre seg både i og etter skuletid. Andre undervisningslokale nytta av kulturskulen er Gymmen, Selje Prestegard, Innbyggjartorget i Selje, Fjordane folkehøgskule, Operahuset, samt fleire bygde- og samfunnshus i kommunen.
Stad kulturskule er ein aktiv aktør i lokalsamfunnet og samarbeider med skulane, barnehagane, integreringstenesta, Operahuset Nordfjord, Opera Nordfjord, Gymmen scene og studio, Kulturhuset Gamlebanken, Selje Prestegard, Fjordane folkehøgskule, institusjonar i kommunen, frivillige lag og organisasjonar, Kyrkja i Stad, Malakoff Rockfestival, Ung kultur møtast (UKM) og det private næringslivet. I samarbeid med desse har kulturskulen mange større og mindre framsyningar i løpet av året der elevane får høve til å utfalde seg kreativt